Hybrid Safe Hazards

ការងារជាមួយម៉ាស៊ីនហាយព្រីត

អាគុយហាយព្រីត (High-Voltage Battery)

ជាគោលការណ៍ រថយន្តហាយព្រីត (Hybrid Cars) ដែលមានរបៀបបរម៉ាស៊ីន ដោយប្រព័ន្ធបរអេឡិចត្រិចពេញលេញ (full electric driving mode) ប្រើប្រាស់ អាគុយហាយព្រីត ដែលវាមានតង់ស្យុងខ្ពស់ជាង រថយន្តហាយព្រីតទាំងឡាយណា ដែលមានប្រព័ន្ធបរអេឡិចត្រិច មិនពេញលេញ ។ ជាឧទាហរណ៍ អាគុយហាយព្រីត ដែលបានបំពាក់ក្នុងឡានម៉ូដែល Honda Civic Hybrid មានតង់ស្យុង 144 V ។ រថយន្តហាយព្រីតពីក្រុមហ៊ុនតូយូតា ជំនាន់ទី1 របស់ម៉ូដែល Toyota Prius (2001-2003) មានតង់ស្យុង 273.6 V ចំណែកតឯរថយន្តជំនាន់ទី2 ម៉ូដែល Toyota Prius (2004-2008) មានតង់ស្យុង 201.6 V ។ ឡានរបស់ក្រុមហ៊ុនហ្វត ម៉ូដែល Ford Escape Hybrid មានតង់ស្យុងរហូតដល់ 330 V ។ រោងចក្រផលិតឡាន Porsche មានគំរោង Mission-E កំពុងអភិវឌ្ឍន៍ និងផលិតរថយន្ត Porsche ប្រើប្រព័ន្ធ ហាយព្រីត ដែលមានតង់ស្យុង រហូតដល់ 800 V ។

តង់ស្យុង នៅក្នុងអាគុយហាយព្រីតជាច្រើន (hybrid batteries) អាចធ្វើឲ្យមាន គ្រោះថ្នាក់ដល់ជីវិត ប្រសិនបើមានការឆក់ចរន្តអគ្គិសនី (lethal shock) ។ អាគុយហាយព្រីត ជាប្រភេទអាគុយ មានចរន្តជាប់ (Direct Current [DC]) ។ កម្រិតតង់ស្យុងរបស់ចរន្តជាប់ ដែលអាចធ្វើឲ្យមនុស្សមានគ្រោះថ្នាក់ចាប់ពី 55 – 60 V បើប្រៀបធៀបជាមួយចរន្តឆ្លាស់ (Alternate Current [AC]) ដែលមានតង់ស្យុងចាប់ពី 110 V ។ ចំណែកឯអាគុយឡាន 12 V (starter battery) គ្មានគ្រោះថ្នាក់អំពីការឆក់ ចរន្តអគ្គិសនី ប៉ុន្តែតង់ស្យុងរបស់ប្រព័ន្ធ បញ្ឆេះឡាន (igniting system) មានតង់ស្យុងខ្ពស់ ដែលអាចធ្វើឲ្យអ្នក អាចឆក់ខ្សែភ្លើង ។

តើអាគុយហាយព្រីតពិតជាមានគ្រោះថ្នាក់ពិតមែនឬ ?

វាមិនមានគ្រោះថ្នាក់ទេ ប្រសិនបើអ្នកមានបច្ចេកទេស ក្នុងការធ្វើការងារផ្សេងៗ ជាមួយប្រព័ន្ធម៉ាស៊ីនហាយព្រីត និងយល់ដឹង អំពីការការពារ នៃគ្រោះថ្នាក់ បណ្ដាលមកពីការឆក់ចរន្តអគ្គិសនី ។ ត្រូវតែធ្វើការ ដោយយោងតាម ការណែនាំរបស់ រោងចក្រផលិតរថយន្ត ។

សុវត្ថភាពប្រព័ន្ធហាយព្រីត (Hybrid Safety)

ខ្សែភ្លើងរបស់អាគុយហាយព្រីត (high-voltage cables) បំពាក់នៅក្នុងឡាន ជាទូទៅ មានពណ៌កូដសម្គាល់ (color-coded) សម្រាប់ដាសតឿនអ្នក អំពីគ្រោះថ្នាក់ នៃការឆក់ចរន្តអគ្គិសនី ។ ខ្សែភ្លើងអាគុយហាយព្រីតមាន ពណ៌ទឹកក្រូច សូមជៀសវាង ការយកដៃទៅប៉ះពាល់ ខ្សែភ្លើងផ្ទាល់ ប្រសិនបើ មិនទាន់ផ្ដាច់ ចរន្តអគ្គិសនី ។

អាគុយហាយព្រីតទាំងអស់ (hybrid batteries) មានកុងតាក់សុវត្ថភាព ឬឆ្នុកមេកានិច (disconnect mechanism) ប្រើសម្រាប់ផ្ដាច់ អាគុយ ពីប្រព័ន្ធអេឡិចត្រូនិចឡាន (electrical system) ។ ទីតាំងរបស់កុងតាក់សុវត្ថភាពអាគុយ (safety switch) ត្រូវមើលសៀវភៅ ប្រើប្រាស់ឡាន (owner’s manual) ឬ សួរអ្នកជំនាញការ ប្រព័ន្ធហាយព្រីត ។

អ្នកគួរតែពាក់ស្រោមដៃក្រាស់ ប្រើសម្រាប់ការពារចរន្តអគ្គិសនី ត្រូវត្រួតពិនិត្យមើល ស្រោមដៃការពារ ប្រសិនមានប្រហោង ឬការរហែក ដែលធ្វើឲ្យតង់ស្យុងរត់ប៉ះ ដៃដោយចៃដន្យ ។

បន្ទាប់មក ត្រូវប្រាកដថា ម៉ាស៊ីនឡានបិទ ដកសោឡានចេញ ទើបធ្វើការជួសជុល និង ធ្វើការងារផ្សេងៗ ។ រឿងមួយទៀតដែលអ្នកត្រូវដឹង គឺត្រូវរង់ចាំ 15 នាទី បន្ទាប់ការផ្ដាច់ចរន្តអគ្គិសនី ពីអាគុយហាយព្រីត មុនពេលធ្វើការជួសជុល ។ កាប៉ាស៊ីតេរបស់តង់ស្យុង (high-voltage capacitors) នៅខាងក្នុង ឧបករណ៍ បំលែងតង់ស្យុង (inverter) ត្រូវការពេលវេលា ដើម្បីបញ្ចេញចោលថាមពលរបស់វា ។

ការងារជាមួយប្រព័ន្ធហាយព្រីត

មានចំនុចមួយចំនួនជួយអ្នក ឲ្យអាចសម្គាល់ថាឡានមួយបានបំពាក់ប្រព័ន្ធហាយព្រីត ៖

ពាក្យ Hybrid មានបិទនៅផ្នែកខាងក្រៅឡាន
ពាក្យ Hybrid មាននៅលើគម្របម៉ាស៊ីន
ខ្សែភ្លើងពណ៌ទឹកក្រូច មាននៅក្នុងឃ្លុបម៉ាស៊ីន

រឿងសំខាន់ដែលអ្នកត្រូវដឹង ៖

ការអូសទាញ (towing) : នៅពេលឡានខូចតាមផ្លូវ អ្នកមិនអាចអូសឡាន ដោយឲ្យកង់ឡានវិល ពីព្រោះ ម៉ូទ័រអគ្គិសនី មានមុខងារជាអ្នកផ្គត់ផ្គង់ចរន្ត (motor/generator) ហើយវានឹងបង្កើតចរន្ត ប្រសិនបើឡានវិលកង់ ។ ដូច្នេះ ត្រូវប្រើឡានស្ទូច ឬប្រើរម៉ក់ដឹកឡានទៅហ្គារាសជួសជុល ។
នៅក្នុងបន្ទាប់បាញ់ថ្នាំ (paint booth chamber) : ប្រសិនបើអ្នកបាញ់ថ្នាំឡាន មិនត្រូវចតឡាន នៅក្នុងបន្ទប់បាញ់ថ្នាំយូពេកទេ សីតុណ្ហភាពនៅក្នុងឡាន កើនឡើងខ្លាំង ធ្វើឲ្យអាគុយហាយព្រីតខូច (damage hybrid battery) ។
ប្រើម៉ាស៊ីនស្កេនរបស់រោងចក្រ (factory scan tool) : មានសកម្មភាព មួយចំនួន តម្រូវអ្នបច្ចេកទេសឡាន ប្រើម៉ាស៊ីនស្កេន បញ្ចូលកម្មវិធីឡើងវិញ បន្ទាប់ពី ការជួសជុល ឬ ផ្លាស់ប្ដូរអាគុយហាណព្រីតថ្មី ។

របៀបដោះអាគុយហាយព្រីត (High-Voltage Battery Disconnection)

សម្រាប់ឡានម៉ូដែល Toyota Prius ជំនាន់ទី1 ត្រូវបើកទ្វាឃ្លុបក្រោយ ដោះខ្សែដែលស្ថិត នៅផ្នែកកែងខាងឆ្វេងចេញ ទាញខ្សែភ្លើង ពណ៌ទឹកក្រូច ចេញពីឆ្នុក ។

សម្រាប់ម៉ូដែលឡាន Toyota Prius (2004) រោងចក្រផលិតឡានតូយ៉ូតា និយាយថា ដំបូងត្រូវដោះខ្សែប៉ូលដក (negative cable) របស់អាគុយឡាន 12 V (starter battery) ដែលស្ថិតនៅឃ្លុបក្រោយ (trunk) ។ ដោះសន្ទៈក្រោយឡានចេញ (floor panel) ផ្ដាច់ចរន្តអគ្គិសនី ពីអាគុយ 12 V បន្ទាប់មក ចាប់ផ្ដើមដោះឆ្នុកខ្សែអាគុយហាយព្រីត (ត្រូវពាក់ស្រោមដៃក្រាស់ ការពារការឆក់ចរន្តអគ្គិសនី) ។ ប្រសិនបើអ្នក ត្រូវដោះ ឬ ធ្វើការផ្លាស់ប្តូរហ្វុយស៊ីប (fuse) វាស្ថិតនៅខាងស្ដាំ ខាងស្ដាំ ឆ្នុកភ្ជាប់អាគុយ ។

ចំពោះឡានម៉ូដែល Ford Escape Hybrid ត្រូវដាក់លេខមកចំនុច P ដោះសោចេញ ពីឡាន មានន័យថាបិទប្រព័ន្ធហាយព្រីត (hybrid system) ប៉ុន្តែមិនមិនមានន័យថា វាត្រូវបានផ្ដាច់ចរន្តចេញពី អាគុយហាយព្រីតនោះទេ ។

បើករន្ធមូល មានគម្រាប ពណ៌ទឹកក្រូច នៅផ្នែកខាងក្រោយឡាន (tailgate) បន្ទាប់មក ដោះកុងកាក់ ឬឆ្នុកភ្ជាប់ចរន្តចេញពី អាគុយហាយព្រីត ។ ត្រូវពាក់ស្រោមដៃក្រាស់ការពារការឆក់ចរន្តអគ្គិសនី ហើយមួលឆ្នុក តាមទិសផ្ទុយ ទ្រនិចនាឡិការ ដើម្បីទាញវាចេញ ។

Articles by Larry Carley, Nationally Recognized Automotive Technical Writer and Author
Prepared by Tiv Dararith, Mechanical Engineer at Institute of Technology of Cambodia

Plug-In Hybrid

រថយន្តហាយព្រីតដែលមានឆ្នុកសាក

គ្រឿងបង្គុំម៉ាស៊ីនហាយព្រីត (Hybrid Assemblies)

រថយន្តហាយព្រីត មានគ្រឿងបង្គុំ ដូចជា ស្នប់ខ្យល់ (vacuum pump), ស្នប់ទឹកស្អំ (coolant pump), ប្រព័ន្ធចង្កូតអេឡិចត្រូនិច (electrical power steering) សូម្បី ស្នប់ហ្គាសម៉ាស៊ីនត្រជាក់ (A/C compressor) ក៏មានដំណើរការ ដោយប្រព័ន្ធ អេឡិចត្រូនិចផងដែរ ។

គ្រឿងបង្គុំទាំងអស់ ជាទូទៅ មានដំណើរការតែនៅពេលដែលចាំបាច់ ឬ អាស្រ័យទៅលើ ការបញ្ជាល្បឿន (speed control) ។

ផលប្រយោជន៍បន្ថែមទៀត នៃប្រព័ន្ធម៉ាស៊ីនបរដោយអគ្គិសនី (electric drive) គឺគ្រឿងបង្គុំអគ្គិសនីទាំងអស់ អាចមានដំណើរការ បើទោះជាម៉ាស៊ីនចំហេះក្នុង (internal combustion engine) ត្រូវបានបិទក៏ដោយ ។ តួយ៉ាង ប្រព័ន្ធម៉ាស៊ីនត្រជាក់ (A/C system) រាប់បញ្ចូលទាំង ប៉ូតុងបញ្ជា (remote control) អាចបញ្ជាឲ្យ ដំណើរការផងដែរ មុនពេលម៉ាស៊ីនឆេះឡើង ។

បន្ទាប់ពីម៉ាស៊ីនត្រូវបានបិទ ស្នប់ទឹក (water pump) និងស្នប់ហ្គាស ម៉ាស៊ីនត្រជាក់ (A/C compressor) ដែលដើរដោយអេឡិចត្រូនិច ជួយបន្តភាពត្រជាក់ទៅឲ្យ ឧបករណ៍បំលែងអគ្គិសនី (inverter), អាគុយហាយព្រីត (high-voltage battery) និងឲ្យភាពត្រជាក់ទៅ ផ្នែកខាងក្នុងរថយន្ត (passenger compartment) ។ ក្នុងករណី១ចំនួនទៀត គ្រឿងបង្គុំដើរដោយអគ្គិសនី (electrically assemblies) មិនសហការជាមួយ សៀគ្វីចរន្តអគ្គិសនី របស់ប្រព័ន្ធតង់ស្យុងខ្ពស់ (high-voltage system) នៃរថយន្តហាយព្រីតទេ ។

ប្រព័ន្ធម៉ាស៊ីនហាយព្រីតដែលមានឆ្នុកសាក (Plug-In Hybrid)

រថយន្តហាយព្រីត ដែលមានឆ្នុកសាកអាគុយហាយព្រីត (plug-in hybrid) គឺមានឧបករណ៍សាកអាគុយ ដោយប្រើឆ្នុកថាមពលអគ្គិសនី (electric power grip) ។

ម៉ាស៊ីនហាយព្រីតមានឆ្នុកសាកអាគុយ (plug-in hybrids) ជាប្រភេទរថយន្ត អេឡិចត្រិច (PHEV/Plug-In Hybrid Electric Vehicle) ដែលមានអាគុយហាយព្រីត ទំហំធំជាងម៉ាស៊ីនហាយព្រីតសេរ៊ីចាស់ៗ (conventional hybrid) ។ សមត្ថភាពអាគុយហាយព្រីត ឬ អាគុយតង់ស្យុងខ្ពស់ (high-voltage battery) អាចផ្ដល់ឲ្យរថយន្ត ជាមួយកំលាំងខ្លាំង ជាងការប្រើប្រាស់ រថយន្តអគ្គិសនីសុទ្ធ ។

ប្រព័ន្ធឆ្នុកសាកអាគុយ (plug-in system) ៖ ជាបែបផែនឆ្នុកសាក ត្រូវបានប្រើប្រាស់ សម្រាប់ ឆ្នុកភ្ជាប់បណ្ដាញ1 (single-phase 230 V) មានតង់ស្យុង 230 V និង ឆ្នុកភ្ជាប់បណ្ដាញ3 (three-phase 400 V) មានតង់ស្យុង 400 V ដែលមានចរន្ត រហូតដល់ 63 A នៃការសាកចរន្តអគ្គិសនី (charging current) ។ ការសាកអាគុយហាយព្រីត ដែលប្រើ ឆ្នុកភ្ជាប់បណ្ដាញ3 (three-phase) អាចធ្វើឲ្យរយះពេលសាកខ្លីជាង 10% បើប្រៀបធៀបជាមួយ ការសាករបស់ ឆ្នុកភ្ជាប់បណ្ដាញ1 (single-phase) ។

សម្រាប់គោលការណ៍នេះ ប្រព័ន្ធសាកអាគុយ (charging system) ក៏រួមបញ្ចូលផងដែរនូវ រនុកភ្ជាប់ការទាក់ទង (communication interface) រវាងស្ថានីយសាកអាគុយ (charging station) និងខ្សែឆ្នុកសាករបស់ រថយន្តហាយព្រីត ។

ប្រព័ន្ធឆ្នុកសាកអាគុយហាយព្រីត មានលក្ខណៈសុវត្ថភាពជាច្រើនដូចជា ៖

ភ្លើងសញ្ញាដាសតឿន (immobiliser activation) : ជាប្រព័ន្ធមានសៀគ្វីដោយឡែក ប្រើដើម្បីឆែកមើល ថាតើឆ្នុកសាក (charging plug) ត្រូវបានភ្ជាប់ដែរឬទេ ។ ដូច្នេះករណី ដែលឆ្នុកសាកមិនទាន់ ភ្ជាប់បានត្រឹមត្រូវ នឹងមិនអាចកើតឡើងទេ ។

សុវត្ថភាពអគ្គិសនី (electrical safety) : សៀគ្វីទី2 (second circuit) ប្រើសម្រាប់ឆែកមើលថា តើឆ្នុកសាក (charging plug) ត្រូវបានភ្ជាប់ស៊ុប ស្រួលបួល ហើយឬនូវ បន្ទាប់មកទើប តង់ស្យុងអគ្គិសនីអាច បញ្ចូនទៅសាកអាគុយបាន ។

ការការពារចរន្តកើនឡើងហួសប្រមាណ (overload protection) : គេប្រើរ៉េស៊ីស្តង់អគ្គិសនី (electrical resistors) នៅក្នុងកូដឆ្នុកសាក (charging plug code) អនុញ្ញាតឲ្យចរន្តដែលបានកំណត់ ដោយខ្សែភ្លើងសាកអាគុយ ។

ឧបករណ៍ការពារ (component protection) : រថយន្តហាយព្រីត ទទួលពត៌មាន អំពីអំព៉ែ (amperage) ដែលមាននៅក្នុង ស្ថានីយសាកអាគុយ (charging station) ហើយកំណត់ ចរន្តអតិបរមា នៃខ្សែសាកអាគុយហាយព្រីត (charging cable) ។ លើសពីនេះទៅទៀត ប្រព័ន្ធនេះ ឆែកមើលថា តើឆ្នុកភ្ជាប់ និងខ្សែម៉ាសដី (earth/ground connector) ត្រូវបានភ្ជាប់បានត្រឹមត្រូវឬទេ ។

ប្រព័ន្ធសាកអាគុយហាយព្រីត (plug-in system) គឺបំពាក់ផងដែរជាមួយ ការផ្ដាច់សៀគ្វីខ្សែម៉ាសដី (earth/ground circuit breaker) ដើម្បីសុវត្ថភាព ។

Porsche Cayenne – Plug-in-Hybrid

Textbook by EUROPA LEHRMITTEL, Modern Automotive Technology
The German Edition was Written by Technical Instructor, Engineers and Technicians
Prepared by Tiv Dararith, Mechanical Engineer at Institute of Technology of Cambodia

Hybrid Car

រថយន្តហាយព្រីត

Porsche 918 Spyder Plug-In Hybrid Concept

រថយន្តហាយប្រីដ (hybrid car) មានច្រើនប្រភេទម៉ាស៊ីន ។ ម៉ាស៊ីនចំហេះក្នុង (internal combustion engine [ICE]) និងម៉ូទ័រអគ្គិសនី (electric motor) ធ្វើការជាមួយគ្នា ដើម្បីផ្ដល់ថាមពលអោយឡានអាចបរបាន ។ ប្រភេទម៉ាស៊ីនហាយព្រីត មានដូចជា ៖

សេរ៊ីហាយព្រីត (Series Hybrid) : ម៉ូទ័រអគ្គីសនី (electric motor) ជាអ្នកផ្ដល់ថាមពលឲ្យឡានបរ (propulsion power) ហើយម៉ាស៊ីនចំហេះក្នុង (ICE) ប្រើសម្រាប់ផ្គត់ផ្គង់ថាមពលអគ្គិសនី (generator) ។
ប៉ារ៉ាឡែលហាយព្រីត (Parallel Hybrid) : ម៉ាស៊ីនចំហេះក្នុង និង ម៉ូទ័រអគ្គីសនី ជាអ្នកបង្កើតថាមពលឲ្យឡានបរបាន ។ ម៉ាស៊ីន និង ម៉ូទ័រ ត្រូវតែធ្វើការ ជាមួយគ្នា ហើយភ្ជាប់គ្នាទៅវិញ ទៅមក ។
សេរ៊ីប៉ារ៉ាឡែលហាយព្រីត (Series/Parallel Hybrid) : ម៉ាស៊ីនចំហេះក្នុង និងម៉ូទ័រអគ្គីសនី ជាអ្នកបង្កើតថាមពលឲ្យឡានបរបាន ។ ប៉ុន្តែ ម៉ាស៊ីន និង ម៉ូទ័រ អាចផ្ដាច់ចេញ ដោយធ្វើការផ្សេងគ្នា ។

អ្នកអាចសាកអាគុយហាយព្រីត ឬអាគុយដែលមានតង់ស្យុងខ្ពស់ (high-voltage battery) នៅតាមស្ថានីយសាកអាគុយហាយព្រីត (external electric power source) ។ រថយន្តហាយព្រីតទាំងឡាយណា ដែលអាចឲ្យអ្នកបរឡាន សាកអាគុយហាយព្រីតបាន ត្រូវបានគេហៅថា រថយន្តហាយព្រីតមានឆ្នុកសាក (plug-in hybrid) ។

សេរ៊ីហាយព្រីត (Series Hybrid)

ម៉ាស៊ីនចំហេះក្នុង (ICE) នៃឡានប្រភេទសេរ៊ីហាយព្រីត ប្រើសម្រាប់តែបង្វិល ម៉ាស៊ីនភ្លើង (generator) ដើម្បីបង្កើតថាមពលអគ្គីសនី បញ្ជូនទៅឲ្យ ម៉ូទ័រអគ្គីសនី (electric motor) ហើយ ម៉ូទ័រអគ្គីសនី បានប្រើប្រាសថាមពលនេះ យកទៅបរឡាន ។

ម៉ូទ័រអគ្គីសនី ទទួលថាមពលពី អាគុយហាយព្រីត (HV battery) ដើម្បីយកទៅ បង្វិលកង់ឡាន នៅពេលឡានមានល្បឿនយឺត និងនៅពេលបញ្ឆេះ ។ ហើយម៉ាស៊ីនចំហេះក្នុងនឹងត្រូវបានបិទ ។

នៅពេលឡានបរទៅមុខ ម៉ាស៊ីនចំហេះក្នុង (ICE) បង្វិលម៉ាស៊ីនភ្លើង (generator) ។ ហើយ ម៉ាស៊ីនភ្លើង និងអាគុយហាយព្រីត (HV battery) បានផ្ដល់ថាមពលទៅអោយ ម៉ូទ័រអគ្គិសនី ។

ករណីឡានបរល្បឿនថេរ ម៉ាស៊ីនចំហេះក្នុង (ICE) បង្វិលម៉ាស៊ីនភ្លើង (generator) ។ ថាមពលបន្ថែមត្រូវបានផ្គត់ផ្គង់ ទៅឲ្យ ម៉ូទ័រអគ្គីសនី ហើយថាមពលនៅសល់ ត្រូវបានបង្វែរយកទៅរក្សាទុកនៅក្នុងអាគុយហាយព្រីត (HV battery) ។

នៅពេលឡានបន្ថយល្បឿន ឬនៅពេលជាន់ហ្រ្វាំង បញ្រ្ជាសមកវិញ ម៉ូទ័រអគ្គីសនី ចាប់ផ្ដើមធ្វើការដូចទៅនឹងម៉ាស៊ីនភ្លើង ។ ថាមពលដែលបានមកពីការចាប់ហ្រ្វាំង (brake energy) ត្រូវយកទៅរក្សាទុកក្នុង អាគុយហាយព្រីត (HV battery) ។

ប៉ារ៉ាឡែលហាយព្រីត (Parallel Hybrid)

រថយន្តប៉ារ៉ាឡែលហាយព្រីត ប្រើម៉ាស៊ីនចំហេះក្នុង (ICE) និងម៉ូទ័រអគ្គិសនី (electric motor) សម្រាប់បំបរឡានទៅមុខ ។

នៅខណៈដែលឡាននៅស្ងៀម ម៉ាស៊ីនចំហេះក្នុង នឹងឈប់ដំណើរការ ហើយនៅពេលដែលអ្នកចាប់ផ្ដើមបរឡានទៅមុខ នៅខណៈនោះដែរ ម៉ូទ័រអគ្គិសនី នឹងបញ្ឆេះម៉ាស៊ីនចំហេះក្នុង ។

នៅពេលឡានបន្ថែមល្បឿន ម៉ាស៊ីនចំហេះក្នុង ( ICE) និងម៉ូទ័រអគ្គីសនី (electric motor) បង្វិលកង់ឡានឲ្យទៅមុខ ។ ហើយ ម៉ូទ័រអគ្គីសនី ត្រូវបានទទួល ថាមពល ពីអាគុយហាយព្រីត (HV battery) ។

ករណីឡានបរល្បឿនថេរ ម៉ាស៊ីនចំហេះក្នុង ផ្ដល់ថាមពលទៅបរឡាន ហើយថាមពលដែលនៅសល់ ត្រូវបានយកទៅសាកអាគុយហាយព្រីត ។ នៅក្នុងករណីនេះ ម៉ូទ័រអគ្គីសនី ត្រូវបានធ្វើការជាម៉ាស៊ីនភ្លើង (generator) ។

នៅពេលជាន់ហ្រ្វាំង ម៉ូទ័រអគ្គិសនី មានមុខងារជាម៉ាស៊ីនភ្លើង ប្រើសម្រាប់សាក អាគុយហាយព្រីត ។ ថាមពលជាន់ហ្រ្វាំង (brake energy) ត្រូវបានយកទៅសាក អាគុយហាយព្រីត ។

សេរ៊ីប៉ារ៉ាឡែលហាយព្រីត (Series/Parallel Hybrid)

រថយន្តហាយព្រីតប្រភេទសេរ៊ីប៉ារ៉ាឡែល (Series/Parallel Hybrid) អាចបរ ទៅបានដោយម៉ូទ័រអគ្គីសនី (electric motor) ដូចគ្នាទៅនឹង រថយន្តប្រភេទ សេរ៊ីហាយព្រីត (Series Hybrid) ដែរ ។ ប៉ុន្តែម៉ាស៊ីនចំហេះក្នុង (ICE) ធ្វើការជាដៃគូរបស់ម៉ូទ័រអគ្គិសនី (electric motor) ។

ម៉ូទ័រអគ្គីសនី ទទួលយកថាមពល ពីអាគុយហាយព្រីត (HV battery) ទៅបង្វិលកង់ តាមរយៈ ប្រអប់បែងចែកថាមពល (power splitter) នៅខណៈ ឡានបរយឺត និងពេលបញ្ឆេះ ។ ម៉ាស៊ីនចំហេះក្នុងនឹងឈប់ដំណើរការ ។

នៅពេលបន្ថែមល្បឿន ម៉ាស៊ីនចំហេះក្នុង (ICE) បង្វិលកង់ឡាន និងម៉ាស៊ីនភ្លើង (generator) ។ ម៉ាស៊ីនភ្លើង (generator) ចែកចាយថាមពល ទៅឲ្យម៉ូទ័រអគ្គិសនី (electric motor) ។ ម៉ូទ័រអគ្គិសនីទទួលបានថាមពលពី អាគុយហាយព្រីត (HV battery) និងម៉ាស៊ីនភ្លើង (generator) យកទៅបង្វិលកង់ឡាន ។

ពេលឡានបរល្បឿនថេរ ម៉ាស៊ីនចំហេះក្នុង បង្វិលកង់ឡាន និង ម៉ាស៊ីនភ្លើង ហើយ ម៉ូទ័រអគ្គីសនី ក៏ជាអ្នកបង្វិលកងឡានផងដែរ ។ ម៉ូទ័រអគ្គីសនីទទួលបានថាមពល ពីម៉ាស៊ីនភ្លើង ។

ម៉ាស៊ីនភ្លើង (generator) បង្កើតថាមពលបន្ថែម ទៅឲ្យម៉ូទ័រអគ្គិសនីដំណើរការ ហើយអាគុយហាយព្រីត (HV battery) ត្រូវបានសាក ។

ពេលជាន់ហ្រ្វាំង ឬ បន្ថយល្បឿន ម៉ូទ័រអគ្គីសនី (electric motor) ដើរតួនាទីជា ម៉ាស៊ីនភ្លើង (generator) ។ ថាមពលដែលទទួលបាននៅពេលជាន់ហ្រ្វាំង ត្រូវរក្សាទុកនៅក្នុង អាគុយហាយព្រីត (HV battery) ។

CNET On Cars – Car Tech 101, Hybrid systems explained

Textbook by Electude Beheer B.V. World’s Leading Automotive E-learning Application
Prepared by Vot Chanthy, Mechanical Engineer at Institute of Technology of Cambodia